Katika hafla hiyo ya kihistoria, Rais wa Jamhuri ya Muungano wa Tanzania, Mhe. Dkt. Samia Suluhu Hassan, amezindua Tawi la Benki ya NMB na Tawi la Benki ya Watu wa Zanzibar (PBZ), yaliyopo eneo la Paje, katika Mkoa wa Kusini Unguja, Zanzibar. Uzinduzi huo umefanyika katika shamrashamra za Tamasha la Kizimkazi lililomalizika tarehe 31 Agosti, 2023.         

Tukio hilo la uzinduzi lilishuhudiwa na viongozi mbalimbali wa ngazi za juu Serikalini na katika sekta ya fedha, akiwemo Waziri wa Fedha, Dkt. Mwigulu Nchemba. Pia, Gavana wa Benki Kuu ya Tanzania (BoT), Bw. Emmanuel Tutuba, na Naibu Gavana wa BoT, Bw. Julian Banzi Raphael, pia walishiriki katika hafla hiyo. BoT ina dhamana ya usimamizi wa sekta ya fedha nchini.      

Moja ya majukumu makuu ya BoT ni kusimamia na kudhibiti taasisi za fedha, zikiwa benki za kibiashara. Kupitia jukumu hili, BoT hutoa miongozo mbalimbali kwa benki na taasisi nyingine za fedha ili kuhakikisha zinaendesha shughuli zake kwa mujibu wa sheria, kanuni na miongozo mbalimbali.           

Pamoja na mambo mengine, BoT inalenga kuhakikisha benki na taasisi nyingine za fedha zina mtaji wa kutosha ili kukidhi mahitaji ya biashara zao na kuhakikisha kuwa zinastahimili mazingira ya kifedha yenye changamoto.

Aidha, BoT inahakikisha kuwa taasisi za fedha zinazingatia miongozo ya kuzuia utapeli wa fedha na ufadhili wa ugaidi, na pia kuhakikisha kuwa zinatoa huduma zenye ubora kwa wateja wao.        

Aidha, Benki Kuu imeshiriki Maonesho ya kazi mbalimbali katika Tamasha hilo kwa lengo la kutoa elimu kwa umma kuhusu kazi mbalimbali zinazofanywa na BoT.